Það skemmtilega við þessa spurningu er að henni er bæði hægt að svara játandi og neitandi. Fjölskyldan veltir miklum fjármunum þegar horft er til starfsævi fjölskyldumeðlimanna en hún býr líka við nokkra óvissu um tekjur og breytingar á verðlagi, þarf að huga að tryggingum á eignum, lífi og heilsu meðlima sinna, reikna með kostnaði við lántökur og sinna fjárfestingum. Þetta eru allt sömu viðfangsefni og fyrirtæki glíma við. En fjölskyldunni er líka ætlað að gera ýmislegt annað sem ekki er í verkahring fyrirtækja, svo sem að ala upp afkomendur sína, tryggja þeim vernd og öryggi og vera félagsleg og menningarleg stoð.
Í félagsfræðinni er fjölskyldan skilgreind sem stofnun í þjóðfélaginu þar sem meðlimirnir mynda efnahagslega einingu, eru tengdir með blóðböndum, hjónabandi eða öðrum formlegum eða óformlegum hætti og bera uppeldislegar skyldur gagnvart afkomendum. Fjölskyldan hefur fylgt mannkyninu frá örófi alda og er fyrsta samfélagsform manna. Það er því með réttu hægt að segja að fjölskyldan sé undirstaða mannlegs samfélags. Breytingarnar sem fjölskyldumynstrið hefur tekið í aldanna rás snúast einkum um þrjá þætti: Hvernig uppfylla skuli frumþarfirnar, fæði, klæði og húsnæði. Með hvaða hætti skuli viðhalda fjölskyldunni og hvernig reynslu og þekkingu kynslóða skuli miðlað. Það sem er áhugavert fyrir okkur, sem erum að skoða fjárhag heimilisins, er hvernig fjölskyldan sinnir hlutverki sínu og hvert hlutverk hennar er í dag. Fjölskyldan er íhaldsöm stofnun og ber með sér inn í nútímann margt sem ekki verður skilið án þess að líta til baka. Fólk getur kosið að reka heimili af ólíkum ástæðum. Þeir sem búa einir mynda ekki fjölskyldu en reka þó sitt heimili. Fjölskyldan býr sér hins vegar alltaf heimili og er rekstarleg eining.
Heimildin fengin úr bókinni: ,,Þú átt nóg af peningum…þú þarft bara að finna þá”
Ingólfur H. Ingólfsson
